హుజురాబాద్‌లో సీఎం ఒక్క కొత్త పింఛను కూడా ఇవ్వలేదని, పాత పింఛన్లను తొలగించారని బీఆర్‌ఎస్ ఎమ్మెల్యే పాడి కౌశిక్‌రెడ్డి విమర్శించారు. తన నియోజకవర్గంలో ఒక్క కొత్త పింఛను ఇచ్చినా ఎమ్మెల్యే పదవికి రాజీనామా చేస్తానని, లేకుంటే సీఎం రేవంత్‌రెడ్డి రాజీనామా చేస్తారా అని సవాల్ విసిరారు. తన నియోజకవర్గంలో 1,029 పింఛన్లు తొలగించారని తెలిపారు. తెలంగాణ భవన్‌లో శనివారం మీడియాతో మాట్లాడుతూ కౌశిక్‌రెడ్డి, సీఎం రేవంత్‌రెడ్డిపై విమర్శలు చేశారు. సిద్దిపేటలో రేవంత్‌రెడ్డికి డిపాజిట్ కూడా రాదన్నారు. రూ.100 కోట్లతో సిద్దిపేటలో సభ పెట్టి సాధించింది ఏంటని ప్రశ్నించారు. వచ్చే ఎన్నికల్లో కాంగ్రెస్‌కు డిపాజిట్లు కూడా రావని పేర్కొన్నారు. దేవుళ్లపై రేవంత్‌రెడ్డి ఒట్లు వేసి మాట తప్పడంతోనే రాష్ట్రంలో కరవు వచ్చిందని, తెలంగాణలో వర్షాలు పడకపోవడానికి కారణం రేవంత్‌రెడ్డే అంటూ కౌశిక్‌రెడ్డి విమర్శలు చేశారు. (Reported by Mana Telangana Feed.)