సినిమాను జనాలకు కొత్తగా చేర్చాలంటే ప్రచారం కూడా కొత్తగా ఉండాలి. అందుకే హీరోలు వినూత్న మార్గాలు ఎంచుకుంటున్నారు.తాజాగా నటుడు విజయ్ ఆంటోనీ కూడా అదే దారిలో నడిచారు. 'బిచ్చగాడు', 'బిచ్చగాడు 2' సినిమాలతో తెలుగు ప్రేక్షకులకు దగ్గరైన ఆయన, ఇప్పుడు 'అప్పా కుట్టి' అనే సినిమాతో వచ్చారు. ఈ సినిమా ఇటీవలే విడుదలైంది. దీన్ని మరింత మందికి చేర్చాలని ఆయన రైలెక్కారు. తన టీమ్‌తో కలిసి ఓ సాధారణ వ్యక్తిలా జనరల్ బోగీలో ప్రయాణించారు. తోటి ప్రయాణికులతో ముచ్చటించారు. తన సినిమా విశేషాలను వారితో పంచుకున్నారు.చెన్నై నుంచి కోయంబత్తూర్ వెళ్లే ఎక్స్‌ప్రెస్‌లో ఆయన ప్రయాణించినట్లు చిత్రబృందం తెలిపింది. ఈ ఫోటోలు సోషల్ మీడియాలో వైరల్‌గా మారాయి.ఈ ప్రయాణంలో తనకు ఎదురైన అనుభవాలను, ప్రయాణికులతో జరిపిన సంభాషణను విజయ్ ఓ ట్రావెల్ వ్లాగ్‌గా చిత్రీకరించారని.. దాన్ని త్వరలో సోషల్ మీడియాలో విడుదల చేయనున్నట్లు సమాచారం. (Reported by Mana Telangana Feed.)